Nono Kaléndas Septémbris
_
Sancti Bartholomǽi Apóstoli, qui Christi Evangélium in India prædicávit; inde in majórem Arméniam proféctus, ibi, cum plúrimos ad fidem convertísset, vivus a bárbaris decoriátus est, atque, Astýagis Regis jussu, cápitis decollatióne martýrium complévit. Ipsíus sacrum corpus, primo ad Líparam ínsulam, deínde Benevéntum, postrémo Romam ad Tiberínam translátim ínsulam, ibi pia fidélium veneratióne honorátur.
Lima, in Perúvia, natális sanctæ Rosæ a sancta María, Vírginis, e tértio Ordine sancti Domínici. Ejus vero festívitas tértio Kaléndas Septémbris celebrátur.
Népete sancti Ptolomǽi Epíscopi, qui fuit discípulus beáti Petri Apóstoli; atque, ab eo missus in Túsciam ad prædicándum Evangélium, in eádem civitáte gloriósus Christi Martyr occúbuit.
Eódem die sancti Eutýchii, qui fuit discípulus beáti Joánnis Evangelístæ; atque, ob Evangélii prædicatiónem in multis regiónibus cárceres, vérbera et ignes perpéssus, in pace tandem quiévit.
Népete sancti Románi, ejúsdem civitátis Epíscopi, qui, cum esset sancti Ptolomǽi discípulus, fuit étiam in passióne sócius.
Carthágine sanctórum trecentórum Mártyrum, témpore Valeriáni et Galliéni. Hi Mártyres magnánimi, inter ália supplícia, cum Præses fornácem calcáriam accéndi jussísset, et, in præséntia ejus, prunas cum thure exhibéri, atque illis dixísset: « Elígite e duóbus unum, aut thura super his carbónibus offérte Jovi, aut in calcem demergímini », fide armáti, Christum Dei Fílium confiténtes, ictu rapidíssimo se injecérunt in ignem, et inter calcis vapóres in púlverem sunt redácti; ex quo candidátus ille beatórum exércitus appellári Massa cándida méruit.
In Isáuria sancti Tatiónis Mártyris, qui in persecutióne Diocletiáni, sub Urbáno Prǽside, gládio cæsus, martýrii corónam accépit.
Item sancti Geórgii Limniótæ Mónachi, qui, cum ímpium Leónem Imperatórem, quod sacras Imágines frángeret Sanctorúmque relíquias combúreret, reprehendísset, hanc ob causam, ejus jussu mánibus abscíssis et cápite incénso, Martyr migrávit ad Dóminum.
Apud Ostia Tiberína sanctæ Aureæ, Vírginis et Mártyris; quæ, saxo ad collum ligáto, in mare demérsa est. Ipsíus autem corpus, ejéctum ad littus, beátus Nonnus sepelívit.
Rotómagi sancti Audoéni, Epíscopi et Confessóris.
Nivérnis, in Gállia, sancti Patrícii Abbátis.
Neápoli, in Campánia, sanctæ Joánnæ Antídæ Thouret, Vírginis, Institúti Sorórum a Caritáte Fundatrícis, quam Pius Papa Undécimus in album sanctárum Vírginum rétulit.
Massíliæ, in Gállia, sanctæ Æmíliæ de Vialár, Vírginis, Fundatrícis Institúti Sorórum a sancto Joseph ab Apparitióne, fortitudine, patiéntia et caritáte insígnis, quam Pius Duodécimus, Póntifex Máximus, in Sanctárum númerum rétulit.
Valéntiæ, in Hispánia, natális sanctæ Marfæ Michaélæ, Vírginis, Fundatrícis Congregatiónis Ancillárum a Sanctíssimo Sacraménto et Caritátis, patiéndi stúdio ac desidério ánimas Deo lucrándi inflammátæ, quam Pius Papa Undécimus sanctis Virgínibus accénsuit.