Sexto Kaléndas Augústi
_
Nicomedíæ pássio sancti Pantaleónis médici, qui, pro fide Christi, a Maximiáno Imperatóre tentus, et equúlei pœna ac lampadárum exustióne afflíctus, sed inter hæc, Dómino sibi apparénte, refrigerátus, gládii tandem ictu martýrium consummávit.
Vigíliis, in Apúlia, sanctórum Mártyrum Mauri Epíscopi, Pantaleémonis et Sérgii; qui passi sunt sub Trajáno.
Nicomedíæ sancti Hermolái Presbýteri, cujus doctrína beátus Pantáleon ad fidem convérsus est; itémque sanctórum Hermíppi et Hermócratis fratrum, qui, post multas pœnas sibi illátas, capitáli senténtia, ob confessiónem Christi, a Maximiáno Imperatóre puníti sunt.
Córdubæ, in Hispánia, sanctórum Mártyrum Geórgii Diáconi, Aurélii et uxóris Natáliæ, Felícis et uxóris Liliósæ, in persecutióne Arábica.
Nolæ, in Campánia, sanctórum Mártyrum Felícis, Júliæ et Jucúndæ.
Apud Homerítas, in Arábia, commemorátio sanctórum Mártyrum, qui, sub Dúnaan tyránno, ob Christi fidem, incéndio tráditi sunt.
Ephesi natális sanctórum septem Dormiéntium, scílicet Maximiáni, Malchi, Martiniáni, Dionýsii, Joánnis, Serapiónis et Constantíni.
Romæ sancti Cælestíni Papæ Primi, qui damnávit Constantinopolitánum Epíscopum Nestórium, Pelagiúmque fugávit; cujus étiam auctoritáte universális sancta Sýnodus Ephesína advérsus eúndem Nestórium celebráta est.
Antisiodóri deposítio beáti Æthérii, Epíscopi et Confessóris.
Constantinópoli beátæ Anthúsæ Vírginis, quæ, sub Constantíno Coprónymo, ob cultum sanctárum Imáginum, verbéribus cæsa et exsílio relegáta, quiévit in Dómino.