Prídie Kaléndas Júlii
_
Commemorátio sancti Pauli Apóstoli. 
Romæ sanctæ Lucínæ, Apostolórum discípulæ, quæ, de facultátibus suis commúnicans Sanctórum necessitátibus, Christiános in cárcere detentos visitábat, ac sepultúræ Mártyrum inserviébat; juxta quos et ipsa, in crypta a se constrúcta, sepúlta est.
Item Romæ sanctæ Æmiliánæ Mártyris.
Ipso die sanctórum Mártyrum Caji Presbýteri, et Leónis Subdiáconi.
Alexandríæ pássio sancti Basílidis, qui, sub Sévero Imperatóre, cum sanctam Potamiœ́nam Virginem, quam ad supplícium ducébat, ab impudicórum hóminum petulántia tutátus esset, religiósi offícii mercédem ab ea recépit; nam ipsa, post tríduum illi appárens et ejus cápiti corónam impónens, non tantum convértit eum ad Christum, sed étiam, brevi agóne certántem, suis précibus Mártyrem gloriósum effécit.
Lemóvicis, in Aquitánia, sancti Martiális Epíscopi, cum duóbus Presbýteris Alpiniáno et Austricliniáno; quorum vita signis miraculórum ádmodum effúlsit.
In território Vivariénsi, in Gálliis, sancti Ostiáni, Presbýteri et Confessóris.
Saánicæ, in território Vicéntino, sancti Theobáldi, Presbýteri et Eremítæ, ex Campániæ Gállicæ Comítibus; quem Alexánder Papa Tértius, ob sanctitátis et miraculórum famam, Sanctórum cánoni adjúnxit.