Quarto Kaléndas Júlii
_
Vigília sanctórum Apostolórum Petri et Pauli.
Lugdúni, in Gállia, sancti Irenǽi, Epíscopi et Mártyris; qui (ut scribit sanctus Hierónymus) beáti Polycárpi, Smyrnénsis Epíscopi, discípulus fuit, et Apostolicórum témporum vicínus. Is, cum advérsus hæréticos verbis ac scriptis plúrimum decertásset, tandem, in persecutióne Sevéri, cum omni fere civitátis suæ pópulo, coronátus est glorióso martýrio.
Trajécti sancti Benígni, Epíscopi et Mártyris.
Alexandríæ, in persecutióne Sevéri, sanctórum Mártyrum Plutárchi, Seréni, Heraclídis catechúmeni, Herónis neóphyti, et altérius Seréni, Rhaídis catechúmenæ, et Potamiœ́næ cum ipsíus matre Marcélla; inter quos præcípue enítuit Potamiœ́na Virgo, quæ, primo imménsos innumerósque agónes pro virginitáte desudávit, deínde étiam exquisíta et inaudíta torménta pro fide sustínuit, ad últimum, simul cum matre, igne consúmpta est.
Eódem die sancti Pápii Mártyris, qui, in persecutióne Diocletiáni Imperatóris, flagris cæsus, atque in lebétem, oleo et ádipe fervénti plenum, immíssus, áliaque horrénda supplícia perpéssus, demum, datis cervícibus, coronátur.
Córdubæ, in Hispánia, sancti Argymíri, Mónachi et Mártyris, qui in persecutióne Arábica, pro Christi fide, in equúleo pósitus et ense transfóssus est.
Romæ sancti Pauli Primi, Papæ et Confessóris.
Lúere, in diœcési Brixiénsi, sanctæ Vincéntiæ Gerósa, Vírginis, Institúti Sorórum a Caritáte una cum sancta Bartholomǽa Capitánio Fundatrícis, quam Pius Papa Duodécimus albo sanctárum Vírginum accénsuit.