Duodécimo Kaléndas Júlii
_
In ínsula Póntia natális sancti Silvérii, Papæ et Mártyris, qui, cum Anthimum, Epíscopum hæréticum, a suo prædecessóre Agapíto depósitum, restitúere noluísset, a Belisário, agénte ímpia Theodóra Augústa, in exsílium pulsus est, et ibídem, pro fide cathólica multis ærúmnis conféctus, defécit.
Romæ deposítio sancti Nováti, qui fuit fílius beáti Pudéntis Senatóris, et frater sancti Timóthei Presbýteri et sanctárum Christi Vírginum Pudentiánæ et Praxédis, qui ab Apóstolis erudíti sunt in fide. Ipsórum vero domus, in Ecclésiam commutáta, Pastóris Títulus appellátur.
Tomis, in Ponto, sanctórum Mártyrum Pauli et Cyríaci.
Petræ, in Palæstína, sancti Macárii Epíscopi, qui, ab Ariánis passus multa et in Africam relegátus, Conféssor quiévit in Dómino.
Híspali, in Hispánia, sanctæ Floréntinæ Vírginis, soróris sanctórum Leándri et Isidóri Episcopórum.