Sextodécimo Kaléndas Júlii
_
Mogúntiæ pássio sanctórum Aurǽi Epíscopi, et Justínæ soróris, ac ceterórum Mártyrum; qui, synáxim in Ecclésia agéntes, ab Hunnis, Germániam diripiéntibus, trucidáti sunt.
Vesontióne, in Gálliis, sanctórum Mártyrum Ferreóli Presbýteri, et Ferrutiónis Diáconi, qui, a beáto Irenǽo Epíscopo missi ad prædicándum verbum Dei, póstea, sub Cláudio Júdice, divérsis pœnis excruciáti, gládio feriúntur.
Tarsi, in Cilícia, sanctórum Mártyrum Quírici et Julíttæ matris, sub Diocletiáno Imperatóre. Ex eis Quíricus, triénnis puéllus, cum matrem, quæ ante Alexándrum Prǽsidem nervis diríssime cædebátur, implacábili luctu lugéret, ad gradus tribunális illísus intériit; Julítta vero, post dira vérbera et grávia torménta, martýrii sui cursum obtruncatióne cápitis implévit.
Amathúnte, in Cypro, sancti Tychónis Epíscopi, témpore Theodósii Junióris.
Lugdúni, in Gállia, deposítio beáti Aureliáni, Epíscopi Arelaténsis.
Nannéte, in Británnia minóre, sancti Similiáni, Epíscopi et Confessóris.
Misnæ, in Germánia, sancti Bennónis Epíscopi.
In monastério Aquiriénsi, in Brabántia, sanctæ Lutgárdis Vírginis.