Prídie Nonas Júnii
_
Agnóni, in Aprútio citerióre, sancti Francísci, ex nóbili Neapolitána família Carácciolo, Confessóris, Congregatiónis Clericórum Regulárium Minórum Fundatóris, qui mira in Deum et próximum caritáte et ardentíssimo sacræ Eucharístiæ cultus propagándi stúdio flagrávit; atque a Pio Séptimo, Pontífice Máximo, Sanctórum cánoni adscríptus est. Ipsíus corpus Neápolim, in Campánia, translátum fuit, ibíque religiosíssime cólitur.
Romæ sanctórum Mártyrum Arétii et Daciáni.
Sísciæ, in Illýrico, sancti Quiríni Epíscopi, qui, sub Galério Prǽside, pro fide Christi (ut Prudéntius scribit), molári saxo ad collum ligáto, in flumen præcipitátus est; sed, lápide supernatánte, cum circumstántes Christiános, ne ejus terreréntur supplício neve titubárent in fide, diu fuísset hortátus, ipse, ut martýrii glóriam assequerétur, précibus a Deo, ut mergerétur, obtínuit.
Medioláni sancti Clatéi, Epíscopi Brixiénsis et Mártyris, qui, sub Neróne Imperatóre, jussu Præfécti urbis illíus tentus, et, cum renuntiáre Christo nollet, multis verbéribus afflíctus et cápite obtruncátus est.
In Pannónia sanctórum Mártyrum Rútili et Sociórum.
Tíbure sancti Quiríni Mártyris.
Atrébati, in Gálliis, sanctæ Saturnínæ, Vírginis et Mártyris.
Constantinópoli sancti Metrophánis, Epíscopi et Confessóris insígnis.
Milévi, in Numídia, sancti Optáti Epíscopi, doctrína et sanctitáte conspícui, quem sancti Ecclésiæ Patres Augustínus et Fulgéntius suis láudibus celebrárunt.
Verónæ sancti Alexándri Epíscopi.