Quinto Idus Maji
_
Romæ, via Salária, item natális beáti Anthimi Presbýteri, qui, post virtútum et prædicatiónis insígnia, in persecutióne Diocletiáni, in Tíberim præcipitátus, et ab Angelo exínde eréptus, oratório próprio restitútus est; deínde, cápite punítus, victor migrávit ad cælos.
Ibídem sancti Evéllii Mártyris, qui, cum esset de família Nerónis, ad passiónem sancti Torpétis in Christum crédidit, pro quo et decollátus est.
Item Romæ sanctórum Mártyrum Máximi, Bassi et Fábii; qui sub Diocletiáno, via Salária, cæsi sunt.
Auximi, in Picéno, sanctórum Mártyrum Sisínii Diáconi, Dioclétii et Floréntii, discipulórum sancti Anthimi Presbýteri; qui, sub Diocletiáno, lapídibus óbruti, martýrium complevérunt.
Cameríni sanctórum Mártyrum Anastásii et Sociórum; qui, in persecutióne Décii, sub Antíocho Prǽside, cæsi sunt.
Varénnis, in Gállia, sancti Gangúlphi Mártyris.
Viénnæ, in Gállia, sancti Mamérti Epíscopi, qui, ob imminéntem cladem, solémnes ante Ascensiónem Dómini triduánas in ea urbe Litánias instítuit; quem ritum póstea universális Ecclésia recípiens comprobávit.
Apud Silviníacum, in Gállia, deposítio sancti Majóli, Abbátis Cluniacénsis, cujus vita sanctis méritis fuit præclára.
Neápoli, in Campánia, sancti Francísci de Hierónymo, in Tarentínæ diœcésis óppido Cryptaleárum orti, Sacerdótis e Societáte Jesu et Confessóris, exímiæ in salúte animárum procuránda caritátis et patiéntiæ viri; quem Gregórius Papa Décimus sextus in Sanctórum cánonem rétulit.
Apud Septempedános, in Picéno, sancti Illumináti Confessóris.
Cárali, in Sardínia, sancti Ignátii a Láconi, Confessóris, ex Ordine Minórum Capuccinórum, humilitáte, caritáte et miráculis præclári, quem Pius Papa Duodécimus Sanctórum honóribus decorávit.