Octávo Idus Maji
_
In monte Gargáno Apparítio sancti Michaélis Archángeli, quem Pius Papa Duodécimus Radiólogis et Radiumtherapéuticis Patrónum et Protectórem constítuit.
Cracóviæ, in Polónia, natális sancti Stanislái, Epíscopi et Mártyris, qui a Bolesláo, ímpio Rege, necátus est. Ipsíus autem festum prídie hujus diéi celebrátur.
Medioláni item natális sancti Victóris Mártyris, qui, natióne Maurus et a primǽva ætáte Christiánus, a Maximiáno, cum esset in castris imperiálibus miles, compúlsus ut idólis sacrificáret, et in confessióne Dómini fortíssime persevérans, ídeo, primum gráviter fústibus cæsus, sed, Deo protegénte, dolóris expers; deínde liquénti plumbo perfúsus, sed nihil pénitus læsus; novíssime gloriósi martýrii cursum, cápite abscíssus, implévit.
Constantinópoli sancti Agáthii Centuriónis, qui, in persecutióne Diocletiáni et Maximiáni, a Firmo Tribúno delátus quod Christiánus esset, et a Júdice Perínthi Bibiáno sævíssime tortus, Byzántii demum a Procónsule Flaccíno cápitis damnátus est. Ipsíus corpus ad Scyllácium littus, in Calábria, divínitus póstea delátum est, atque ibi honorífice asservátum.
Romæ sancti Bonifátii Papæ Quarti, qui Pántheon in honórem beátæ Maríæ ad Mártyres dedicávit.
Item Romæ sancti Benedícti Secúndi, Papæ et Confessóris.
Viénnæ, in Gállia, sancti Dionýsii, Epíscopi et Confessóris.
Antisiodóri sancti Helládii Epíscopi.
In monastério Bellæ Vallis, in território Bisuntíno, sancti Petri, qui ex Mónacho Cisterciénsi factus est Tarentasiénsis in Sabáudia Epíscopus.
Apud Ruræmóndam, in Géldria, sancti Wirónis, Epíscopi Scoti.