Quarto Kaléndas Maji
_
Sancti Pauli a Cruce, Presbýteri et Confessóris; qui Congregatiónis a Cruce et Passióne Dómini nostri Jesu Christi nuncupátæ Institútor fuit, atque in Dómino obdormívit quintodécimo Kaléndas Novémbris.
Ravénnæ natális sancti Vitális Mártyris, viri sanctæ Valériæ ac patris sanctórum Gervásii et Protásii; qui, cum beáti Ursicíni corpus sublátum débita honestáte sepelísset, tentus est a Paulíno Consulári, et, post equúlei torménta, jussus depóni in profúndam fóveam, et terra ac lapídibus óbrui; talíque martýrio migrávit ad Christum.
Atínæ, in Campánia, sancti Marci, qui, a beáto Petro Apóstolo Epíscopus ordinátus, Æquícolis primus Evangélium prædicávit, et in persecutióne Domitiáni, sub Máximo Prǽside, martýrii corónam accépit.
Prusæ, in Bithýnia, sanctórum Mártyrum Patrícii Epíscopi, Acátii, Menándri et Polyǽni.
Eódem die sanctórum Mártyrum Aphrodísii, Caralíppi, Agápii et Eusébii.
In Pannónia sancti Polliónis Mártyris, sub Diocletiáno Imperatóre.
Medioláni sanctæ Valériæ Mártyris, uxóris sancti Vitális ac matris sanctórum Gervásii et Protásii.
Alexandríæ pássio sanctæ Theodóræ, Vírginis et Mártyris. Hæc, idólis sacrificáre contémnens, in lupánar est trádita, sed repénte quidam ex frátribus, nómine Dídymus, miro Dei favóre, commutátis véstibus, illam erípuit; qui póstea, in persecutióne Diocletiáni, sub Eustrátio Prǽside, simul cum eádem Vírgine percússus, simul coronátus est.
Turiasóne, in Hispánia Tarraconénsi, sancti Prudéntii, Epíscopi et Confessóris.
Corfínii, in Pelígnis, sancti Pámphili, Valvénsis Epíscopi, caritáte in páuperes et virtúte miraculórum illústris; cujus corpus Sulmóne cónditum est.
In pago sancti Lauréntii ad Séparim, diœcésis Lucionénsis, sancti Ludovíci Maríæ Grignion a Montfort, Confessóris, Fundatóris Missionariórum Societátis Maríæ et Filiárum a Sapiéntia, apostólicæ vitæ forma, prædicatióne et devotióne mariáli insígnis, quem Pius Papa Duodécimus Sanctórum catálogo adscrípsit.