Octávo Idus Aprílis
_
Medioláni pássio sancti Petri, ex Ordine Prædicatórum, Mártyris, qui ab hæréticis, ob fidem cathólicam, interémptus est. Ipsíus tamen festívitas recólitur tértio Kaléndas Maji.
Velehrádii, in Morávia, natális sancti Methódii, Epíscopi et Confessóris, qui, una cum sancto Cyríllo, item Epíscopo et fratre suo, cujus natális sextodécimo Kaléndas Mártii recensétur, multas Slávicas gentes earúmque Reges ad fidem Christi perdúxit. Horum autem Sanctórum festum Nonis Júlii celebrátur.
In Macedónia sanctórum Mártyrum Timóthei et Diógenis.
In Pérside sanctórum centum vigínti Mártyrum.
Ascalóne, in Palæstína, pássio sanctórum Platónidis et aliórum duórum Mártyrum.
Carthágine sancti Marcellíni Mártyris, qui, ob cathólicæ fídei defensiónem, ab hæréticis occísus est.
In Dánia sancti Guliélmi Abbátis, vita et miráculis clari.