Kaléndis Aprílis
_
Romæ pássio sanctæ Theodóræ, soróris illustríssimi Mártyris Hermétis, quæ, sub Hadriáno Imperatóre, ab Aureliáno Júdice affecta martýrio, sepúlta est juxta fratrem suum, via Salária, non longe ab Urbe.
Eódem die sancti Venántii, Epíscopi et Mártyris.
In Ægýpto sanctórum Mártyrum Victóris et Stéphani.
In Arménia sanctórum Mártyrum Quinctiáni et Irenǽi.
Constantinópoli sancti Macárii Confessóris, qui, sub Leóne Imperatóre, pro assertióne sanctárum Imáginum, in exsílio vitam finívit.
Ardpatrícii, in Momónia Hibérniæ província, sancti Celsi Epíscopi, qui beátum Malachíam in Episcopátu præcéssit.
Gratianópoli, in Gállia, sancti Hugónis Epíscopi, qui multis annis in solitúdine vitam exégit, et miraculórum glória clarus migrávit ad Dóminum.
Apud Ambiánum, in Gállia, sancti Waleríci Abbátis, cujus sepúlcrum crebris miráculis illustrátur.