Quarto Kaléndas Aprílis
_
Heliópoli, apud Líbanum, sancti Cyrílli, Diáconi et Mártyris, cujus jecur, e discísso ventre avúlsum, Gentíles, sub Juliáno Apóstata, feráliter depásti sunt.
In Pérside sanctórum Monachórum et Mártyrum Jonæ et Barachísii fratrum, sub Rege Persárum Sápore. Ex ipsis Jonas, pressus in cóchlea, confráctis óssibus, médius disséctus est; Barachísius autem, opplétis fáucibus pice ardénti, suffocátus.
Nicomedíæ pássio sanctórum Mártyrum Pastóris, Victoríni et Sociórum.
In Africa sanctórum Confessórum Armogástis Cómitis, Másculæ archimími, et Sáturi, régiæ domus procuratóris; qui, témpore Wandálicæ persecutiónis, sub Rege Ariáno Genseríco, pro confessióne veritátis, multa et grávia perpéssi supplícia atque oppróbria, cursum gloriósi certáminis implevérunt.
In urbe Asténsi sancti Secúndi Mártyris.
In monastério Luxoviénsi, in Gállia, deposítio sancti Eustásii Abbátis, qui sancti Columbáni discípulus et ferme sexcentórum Monachórum Pater fuit; ac, vitæ sanctitáte conspícuus, étiam miráculis cláruit.