Tértio Nonas Mártii
_
Antiochíæ natális sancti Phocæ Mártyris, qui, post multas, quas pro nómine Redemptóris passus est, injúrias, quáliter de antíquo illo serpénte triumpháverit, hódie quoque pópulis eo miráculo declarátur, quod, si quíspiam a serpénte morsus fúerit, hic, ut jánuam Basílicæ Mártyris credens attígerit, conféstim, evacuáta venéni virtúte, sanátur.
Cæsaréæ, in Palæstína, sancti Hadriáni Mártyris, qui in persecutióne Diocletiáni Imperatóris, jussu Firmiliáni Prǽsidis, prius ob Christi fidem leóni objéctus, deínde gládio jugulátus, martýrii corónam accépit.
Eódem die pássio sanctórum Eusébii Palatíni, et aliórum novem Mártyrum.
Cæsaréæ, in Palæstína, sancti Theóphili Epíscopi, qui sub Sevéro Príncipe, sapiéntia et vitæ integritáte conspícuus, emícuit.
Ad ripam Jordánis, item in Palæstína, sancti Gerásimi, Anachorétæ et Abbátis, qui témpore Zenónis Imperatóris flóruit.
Neápoli, in Campánia, deposítio sancti Joánnis-Joséphi a Cruce, Sacerdótis ex Ordine Minórum et Confessóris, qui, sanctórum Francísci Assisiénsis et Petri de Alcántara stúdia æmulátus, Ordini Seráphico insígne decus áddidit, atque a Gregório Papa Décimo sexto in Sanctórum cánonem est relátus.