Tertiodécimo Kaléndas Februárii
_
Romæ natális sancti Fabiáni, Papæ et Mártyris, qui, Décii témpore, martýrium passus est, atque in cœmetério Callísti sepúltus.
Item Romæ, ad Catacúmbas, sancti Sebastiáni Mártyris, qui, Diocletiáno Imperatóre, cum habéret principátum primæ cohórtis, jussus est, sub título christianitátis, ligári in médio campo, et sagittári a milítibus, atque ad últimum fústibus cædi, donec defíceret.
Nicǽæ, in Bithýnia, sancti Neóphyti Mártyris, qui, quintumdécimum annum ætátis agens, flagris cæsus, in fornácem immíssus, feris objéctus, et, cum illǽsus permanéret et Christi fidem constánter profiterétur, gládio tandem occísus est. 
Cæsénæ sancti Mauri Epíscopi, virtútibus et miráculis clari.
In Palæstína natális sancti Euthýmii Abbátis, qui zelo cathólicæ disciplínæ et virtúte miraculórum, témpore Marciáni Imperatóris, in Ecclésia flóruit.