Octávo Idus Januárii
_
Epiphánia Dómini.
Floréntiæ natális sancti Andréæ Corsíni, civis Florentíni, ex Ordine Carmelitárum, Epíscopi Fesuláni et Confessóris; quem, miráculis clarum, Urbánus Papa Octávus in Sanctórum númerum rétulit. Ejus autem festívitas recólitur prídie Nonas Februárii.
Barcinóne, in Hispánia, item natális sancti Raymúndi de Peñáfort, ex Ordine Prædicatórum, Confessóris, doctrína et sanctitáte célebris. Ipsíus vero festum décimo Kaléndas Februárii celebrátur.
In Africa commemorátio plurimórum sanctórum Mártyrum, qui, in persecutióne Sevéri, ad palum ligáti sunt et igne consúmpti.
In território Rheménsi pássio sanctæ Macræ Vírginis, quæ, in persecutióne Diocletiáni, jubénte Rictiováro Prǽside, cum in ignem esset præcipitáta et permansísset illǽsa, dehinc, mamíllis abscíssis et squalóre cárceris afflícta, super testas étiam acutíssimas ac prunas volutáta, tandem orans migrávit ad Dóminum.
Rhédonis, in Gállia, sancti Melánii, Epíscopi et Confessóris; qui, post innumerabílium signa virtútum, júgiter cælo inténtus, gloriósus migrávit a sǽculo.
Geris, in Ægýpto, sancti Nilammónis reclúsi, qui, dum ad Episcopátum traherétur invítus, in oratióne spíritum Deo réddidit.