Tértio Nonas Januárii
_
Octáva sancti Joánnis, Apóstoli et Evangelístæ. 
Romæ, via Appia, natális sancti Anthéri, Papæ et Mártyris; qui sub Júlio Maximíno passus est, et in cœmetério Callísti sepúltus.
Viénnæ, in Gállia, sancti Floréntii Epíscopi, qui, témpore Galliéni Imperatóris, in exsílium relegátus, illic martýrium consummávit.
Apud civitátem Aulánam, in Palæstína, pássio sancti Petri, qui crucis supplício interémptus est.
In Hellespónto sanctórum Mártyrum Cyríni, Primi et Theogénis.
Cæsaréæ, in Cappadócia, sancti Górdii Centuriónis, Mártyris; de cujus láudibus exstat præclára Basílii Magni orátio, in ejus die festo hábita.
In Cilícia sanctórum Mártyrum Zósimi, et Athanásii Commentariénsis.
Item sanctórum Theopémpti et Theónæ, qui, in persecutióne Diocletiáni, illústre martýrium obiérunt.
Patávii sancti Daniélis Mártyris.
Lutétiæ Parisiórum sanctæ Genovéfæ Vírginis, quæ, a beáto Germáno, Antisiodorénsi Epíscopo, Christo dicáta, admirándis virtútibus et miráculis cláruit.