59:1 Deus, reppulísti nos, perfregísti ácies nostras, * irátus es: restítue nos.
59:2 Concussísti terram, scidísti eam; * sana ruptúras ejus: nam vacíllat.
59:3 Imposuísti pópulo tuo dura; * potásti nos vino inebriánti.
59:4 Statuísti timéntibus te vexíllum, * ut fúgerent ab arcu;
59:5 Ut liberéntur dilécti tui, * ádjuva déxtera tua, et exáudi nos.
59:6 Deus locútus est in sanctuário suo: * exsultábo et partíbor Sichem, et vallem Succoth dimétiar.
59:7 Mea est terra Gálaad, et mea terra Manásse, * et Ephraim gálea cápitis mei,
59:8 Juda sceptrum meum, * Moab pelvis lotiónis meæ;
59:9 Super Edom ponam calceaméntum meum, * de Philistǽa triumphábo.
59:10 Quis addúcet me in civitátem munítam? * Quis dedúcet me usque in Edom?
59:11 Nonne tu, Deus, qui reppulísti nos, * nec jam egréderis, Deus, cum exercítibus nostris?
59:12 Da nobis auxílium contra inimícum, * quia vanum est subsídium hóminum.
59:13 Per Deum fórtiter agémus, * et ipse conculcábit inimícos nostros.