(Justus innocens implorat auxilium Dei contra inimicos præpotentes)
16:1 Audi, Dómine, justam causam, atténde clamórem meum, * áuribus pércipe oratiónem meam ex lábiis non dolósis.
16:2 A conspéctu tuo judícium de me pródeat: * óculi tui vident quæ recta sunt.
16:3a Si scrutáris cor meum, si vísitas nocte, si igne me probas, * non invénies in me iniquitátem.
16:3b Non est transgréssum os meum (4) hóminum more; * secúndum verba labiórum tuórum ego custodívi vias legis.
16:5 Fírmiter inhǽsit gressus meus sémitis tuis, * non titubárunt pedes mei.
16:6 Ego te ínvoco, quóniam exáudies me, Deus; * inclína aurem tuam mihi, audi verbum meum.
16:7 Mirábilem osténde misericórdiam tuam, * qui ab adversántibus salvas confugiéntes ad déxteram tuam.
16:8 Custódi me ut pupíllam óculi, sub umbra alárum tuárum abscónde me * (9a) a peccatóribus, qui vim ínferunt mihi.
16:9b Inimíci mei cum furóre me circumvéniunt, (10) crassum cor suum præclúdunt, * ore suo loquúntur supérbe.
16:11 Passus eórum nunc me circúmdant, * óculos suos inténdunt, ut in terram prostérnant,
16:12 Símiles leóni, qui ínhiat prædæ, * et cátulo leónis, qui in ábditis sedet.
16:13 Exsúrge, Dómine, occúrre illi, prostérne eum; éripe a peccatóre ánimam meam gládio tuo, * (14a) manu tua ab homínibus, Dómine:
16:14b Ab homínibus, quorum pórtio est hæc vita, * et quorum ventrem imples ópibus tuis;
16:14c Quorum fílii saturántur * et relínquunt, quod eis súperest, párvulis suis.
16:15 Ego autem in justítia vidébo fáciem tuam, * satiábor, evígilans, aspéctu tuo.