(Cælum et terra laudent Dominum)
148:1 Laudáte Dómino de cælis, * laudáte eum in excélsis.
148:2 Laudáte eum, omnes Angeli ejus, * laudáte eum, omnes exércitus ejus.
148:3 Laudáte eum, sol et luna, * laudáte eum, omnes stellæ lucéntes.
148:4 Laudáte eum, cæli cælórum, * et aquæ quæ super cælos sunt:
148:5 Laudent nomen Dómini, * nam ipse jussit et creáta sunt,
148:6 Et státuit ea in ætérnum, in sǽculum: * præcéptum dedit, quod non transíbit.
148:7 Laudáte Dóminum de terra, * cete et ómnia profúnda maris,
148:8 Ignis et grando, nix et nébula, * ventus procéllæ, qui facit verbum ejus,
148:9 Montes et omnes colles, * árbores frugíferæ et omnes cedri,
148:10 Feræ et ómnia juménta, * reptília et vólucres pennátæ,
148:11 Reges terræ et omnes pópuli, * príncipes et omnes júdices terræ,
148:12 Júvenes et étiam vírgines, senes, una cum púeris: (13a) laudent nomen Dómini, * quia excélsum est nomen ejus solíus;
148:13b Majéstas ejus súperat terram et cælum, * (14a) et altum tríbuit cornu pópulo suo.
148:14b Laus est ómnibus sanctis ejus, * fíliis Israël, pópulo qui propínquus est ei.