XX. De Hymnis

1. Hymni semper dicuntur in qualibet Hora, preterquam a triduo ante Pascha,
usque ad Vesperas Sabbati in Albis exclusive, et preterquam in Officio
Defunctorum.

2. Ad Matutinum Hymnus dicitur post Psalmum Venite repetito Invitatorio,
preterquam in die Epiphaniae. Ad Laudes et Vesperas dicitur post Capitulum : ad
Horas ante Psalmos, ad Completorium post Psalmos et Antiphonam.

3. Dicuntur autem in Officio de Tempore ut in Psalterio, quando proprii Hymni in
Proprio de Tempore non adsunt : qui Hymni de Psalterio in Dominicis, et Feriis
assignati dicuntur ab Octava Pentecostes usque ad Adventum (Dominica infra
Octavam Corporis Christi excepta) et ab Octava Epiphaniae usque ad Dominicam
primam Quadragesime exclusive. In Officio de Sanctis dicuntur ut in Communi
Sanctorum, nisi proprii in Proprio Sanctorum habeantur.

4. In Nativitate Domini usque ad Epiphaniam, in Festo Corporis Christi et per
Octavam, et quandocumque fit Officium beate Marie tam novem, quam trium
Lectionum, etiam tempore Paschali, in fine omnium Hymnorum (preterquam in fine
Hymni Ave maris stella et Hymni ad Laudes in Festo Corporis Christi, qui habet
ultimum versum proprium) dicitur Jesu tibi sit Gloria, Qui natus es de
Virgine, ut in ejus Officio parvo, etiamsi dicantur Hymni de Sanctis, qui
infra Octavas predictas celebrantur, dummodo Hymni illi sint ejusdem metri,
nec habeant ultimum Versum proprium, ut Hymnus sancta Crucis ad Vesperas, et
plurimum Martyrum ad Matutinum.

5. In Epiphania Domini, et per Octavam, in fine omnium Hymnorum dicitur, Jesu
tibi sit gloria, Qui apparuisti gentibus.

6. A Dominica in Albis usque ad Ascensionem, in Pentecoste, et per Octavam, in
fine omnium Hymnorum dicitur Deo Patri sit gloria, Et Filio qui a mortuis;
etiam in Festis Sanctorum eodem tempore Paschali occurrentium; dummodo Hymni
sint ejusdem metri, nec habeant ultimum versum proprium, qui non mutatur, ut
supra.

7. In Ascensione autem usque ad Pentecosten (preterquam in Hymno Salutis
humane Sator) dicitur Jesu, tibi sit gloria, Qui victor in celum redis;
similiter etiam in Festis tunc occurrentibus.

8. In Transfiguratione Domini dicitur Jesu, tibi sit gloria Qui te revelas
parvulis. Aliis temporibus terminantur Hymni, ut suis locis ponitur.~